%20President%20Nelson%20NY%202020%20Image.jpeg)
Նախագահ Ռասսել Մ. Նելսոն
Երբ ելույթ ունեցա անցյալ տարվա հոկտեմբեր ամսվա գերագույն համաժողովին, ես 2020 թվականը
բնութագրեցի որպես երկուհարյուրամյա ժամանակաշրջան, երբ նշում ենք այն իրադարձության 200
տարին, երբ Հայր Աստված և Նրա սիրելի Որդին՝ Հիսուս Քրիստոսը, տեսիլքում հայտնվեցին Ջոզեֆ
Սմիթին: Մարդկության պատմության մեջ այդ եզակի իրադարձությամբ մեկնարկել է Տիրոջ ավետարանի
Վերականգնումը․ մի ծավալվող իրադարձություն, որը շարունակվում է առ այսօր: Որքան օրհնված ենք
այդ տեսիլքի լույսի ներքո ապրելու համար։ Այդ տեսիլքի շնորհիվ նոր հասկացողություն ստացանք մեր Հոր
Աստծո և նրա Որդու՝ Հիսուս Քրիստոսի բնույթի մասին: Աստված սիրում է Իր բոլոր զավակներին և
տեսլական ունի պատրաստած յուրաքանչյուրիս համար: Ճիշտ այնպես, ինչպես 1820 թվականին լսեց
Ջոզեֆի աղոթքը, Նա լսում է ձեզ և ցանկանում է, որ Հոգու միջոցով խոսի ձեզ հետ: Երկնային Հայրը ձեր
կարիքն ունի։ Մենք ձեր կարիքն ունենք։ Այս տարին կարևոր է լինելու։ Մենք հրավիրում ենք ձեզ, որ
մեծապես մասնակցեք Փրկիչի ավետարանի շարունակական վերականգնման ուղերձի տարածման գործին:
Մենք շուտով այդ մասին ավելի շատ կբարձրաձայնենք, բայց դուք կարող եք սկսել այսօր՝ գործելով ըստ
այն հրավերների, որոնք ես հղեցի ձեզ վերջին գերագույն համաժողովի ժամանակ՝ ընկղմվելով
Վերականգնման փառահեղ լույսի մեջ:
Ինչպե՞ս անել դա։ Գուցե ցանկանաք սկսել ձեր նախապատրաստությունը՝ վերստին կարդալով Ջոզեֆ
Սմիթի Առաջին Տեսիլքի պատմությունը, ինչպես գրված է Թանկագին Մարգարիտում։ Կամ մտածեք
հետևյալ կարևոր հարցերի շուրջ․ «Ինչպե՞ս իմ կյանքը կտարբերվեր, եթե Մորմոնի Գրքից սովորած իմ
գիտելիքը հանկարծակի վերցնեին ինձանից», կամ «Առաջին Տեսիլքին հաջորդող իրադարձություններն
ինչպե՞ս փոխեցին իմ և իմ սիրելիների կյանքը»։ Ընտրեք ձեր իսկ հարցերը։ Նախագծեք ձեր անձնական
ծրագիրը։ Գործեք համաձայն այդ հրավերների, որպեսզի պատրաստ լինեք կիսվելու Վերականգնման
շարունակվող կարևոր ուղերձներով: Երբ այս ջանքերում փնտրեք Հիսուս Քրիստոսին, Աստված ձեզ
կպատրաստի, որպեսզի ստանաք ավելի մեծ լույս: Ձեր նախապատրաստության շնորհիվ է, որ ապրիլ ամսվա
գերագույն համաժողովը ձեզ համար կդառնա ոչ միայն հիշարժան, այլև՝ անմոռաց։ Գործելու ժամանակը
հիմա է։ Սա կարևոր ժամանակ է Եկեղեցու պատմության մեջ և ձեր դերը էական է։
Ես վկայում եմ, որ Հիսուս Քրիստոսն ապրում է: Նա առաջնորդում է այս Եկեղեցին այսօր։ Աստված
վստահում է բոլորիս, որ կարևոր դեր ունենանք Իր ավետարանի վերականգնման գործում։